കെൽട്രോണിന് 1056.94 കോടിയുടെ വിറ്റുവരവ്

സംസ്ഥാന വ്യവസായ വകുപ്പിന് കീഴിലുള്ള കെൽട്രോൺ ഇക്കഴിഞ്ഞ സാമ്പത്തിക വർഷം (2024-25) 1056.94 കോടി രൂപയുടെ വിറ്റുവരവ് രേഖപ്പെടുത്തി. സ്ഥാപനത്തിൻ്റെ ചരിത്രത്തിലെ ഏറ്റവും ഉയർന്ന വിറ്റുവരവാണിത്. രണ്ടാം പിണറായി സർക്കാർ ചുമതലയേറ്റ 2021-22 സാമ്പത്തിക വർഷം 521.71 കോടി രൂപയായിരുന്ന വിറ്റുവരവാണ് ഇപ്പോൾ ആയിരം കോടി കടന്നത്. 2023-24 സാമ്പത്തിക വർഷത്തിൽ നേടിയ 643 കോടിയുടെ വിറ്റു വരവ് റെക്കോർഡാണ് ഇപ്പോൾ മറികടന്നിരിക്കുന്നത്. കൃത്യസമയത്തുള്ള ബിസിനസ് ചുവട് മാറ്റവും, പ്ലാൻ ഫണ്ടുകളിലൂടെയും, ബഡ്‌ജറ്റിലൂടെയും സംസ്ഥാന സർക്കാർ നൽകിയ സാമ്പത്തിക പിന്തുണയുമാണ് ചരിത്രനേട്ടത്തിന് വഴിയൊരുക്കിയതെന്ന് വ്യവസായ മന്ത്രി പി.രാജീവ് പറഞ്ഞു. പല പദ്ധതികളിലും ടോട്ടൽ സൊല്യൂഷൻ പ്രൊവൈഡർ എന്ന നിലയിൽ കെൽട്രോണിനെ അംഗീകരിച്ചതും, കമ്പനിയുടെ തിരിച്ചുവരവിനായി ജീവനക്കാർ നടത്തിയ കൂട്ടായ പരിശ്രമവും നേട്ടം രചിക്കാൻ സഹായിച്ചതായും മന്ത്രി പറഞ്ഞു.

ഡിഫൻസ് ഇലക്ട്രോണിക്സ് മേഖലയിലേക്കുള്ള ഉൽപ്പന്നങ്ങൾ നിർമ്മിച്ചു നൽകുന്നതിനുള്ള പദ്ധതി, ഐ.ടി അനുബന്ധ ബിസിനസ്സ്-സേവന മേഖലകളിലെ പ്രവർത്തനങ്ങൾ, സ്മാർട്ട് ക്ലാസ് റൂം സ്ഥാപിക്കുന്ന മേഖലകളിലെ പ്രവർത്തനങ്ങൾ, കൺട്രോൾ ആൻഡ് ഇൻസ്ട്രുമെൻഷൻ, ട്രാഫിക് എൻഫോഴ്സ്‌മെന്റ് സംവിധാനങ്ങൾ, ന്യൂക്ലിയർ പവർ പ്ലാൻ്കൾക്ക് വേണ്ടിയുള്ള പവർ ഇലക്ട്രോണിക്സ് ഉപകരണങ്ങൾ, സ്മാർട്ട് സിറ്റി പദ്ധതികൾ, സെക്യൂരിറ്റി സർവൈലൻസ് പദ്ധതികൾ, മെഡിക്കൽ ഇലക്ട്രോണിക്സ് ഉല്പന്നങ്ങൾ, ഹൈ മീഡിയം മാസ്റ്റ് ലൈറ്റ് പദ്ധതികൾ, ഐ.എസ്.ആർ.ഒയ്ക്ക് വേണ്ടിയുള്ള ഇലക്ട്രോണിക്സ് സംവിധാനങ്ങൾ തുടങ്ങിയ മേഖലകളിലെ പ്രവർത്തനങ്ങൾ വിറ്റുവരവ് വർദ്ധനയിൽ പ്രതിഫലിച്ചു.

സബ്സിഡിയറി കമ്പനികളായ കണ്ണൂരിലെ കെ.സി.സി.എൽ (104.85 കോടി രൂപ), മലപ്പുറത്തെ കെ.ഇ.സി.എൽ (38.07 കോടി രൂപ) എന്നിവ ഉൾപ്പെടെ കെൽട്രോൺ ഗ്രൂപ്പ് കമ്പനികൾ 1199.86 കോടി രൂപയുടെ വിറ്റുവരവും മെച്ചപ്പെട്ട പ്രവർത്തന ലാഭവും ഇക്കാലയളവിൽ കൈവരിച്ചു. മുൻ സാമ്പത്തികവർഷത്തെ വിറ്റുവരവിൽ നിന്നും 50 ശതമാനം വർദ്ധനവാണ് കെൽട്രോൺ ഗ്രൂപ്പ് ഇക്കൊല്ലം നേടിയിട്ടുള്ളത്.

വ്യവസായ വകുപ്പിന് കെൽട്രോൺ സമർപ്പിച്ച മാസ്റ്റർ പ്ലാൻ പ്രകാരം 2026ൽ 1000 കോടി രൂപയുടെ വിറ്റുവരവും 2030-ഓടെ 2000 കോടി രൂപയുടെ വിറ്റുവരവുമുള്ള സ്ഥാപനമായി കെൽട്രോണിനെ വളർത്തുന്നതിനുള്ള പദ്ധതികൾ ആവിഷ്കരിച്ചിരുന്നു. 2025-26 സാമ്പത്തിക വർഷത്തിലും 1000 കോടി രൂപയ്ക്ക് മുകളിൽ വിറ്റുവരവ് നേടിയെടുക്കുമെന്ന് പ്രതീക്ഷിക്കുന്നതെന്ന് മന്ത്രി പറഞ്ഞു. നിലവിൽ 1400 കോടി രൂപയുടെ ഓർഡർ ബുക്കിംഗ് കെൽട്രോണിനുണ്ട്.